मालमत्ता करात ५० टक्के माफी द्या, पैसे भरण्यासाठी ३१ डिसेंबरपर्यंत मुदत द्या : मुख्यमंत्री उद्धव ठाकरे यांना पत्र
सिटी बेल लाइव्ह / अलिबाग (धनंजय कवठेकर) :
कोविड-१९ मध्ये चार महिन्यांपासून आर्थिक फटका बसलेल्या नागरिकांना मालमत्ता करात ५० टक्के माफी द्यावी. त्याचबरोबर पैसे भरण्यासाठी ३१ डिसेंबरपर्यंत मुदत द्यावी, अशी मागणी भाजपाचे आमदार निरंजन वसंत डावखरे यांनी मुख्यमंत्री उद्धव ठाकरे यांच्याकडे केली आहे.
कोविड-१९ मुळे राज्यातील नागरिकांना मोठा फटका बसला. आतापर्यंत चार महिने आर्थिक व्यवहार ठप्प झाल्यामुळे नागरिकांचे मासिक बजेट कोलमडले. त्यात वीज बिल वाढीचीही कुऱ्हाड कोसळली आहे. अशा परिस्थितीत राज्य सरकारने नागरिकांना दिलासा म्हणून मालमत्ता करामध्ये ५० टक्के सवलत द्यायला हवी. राज्यातील महापालिका, नगरपालिका आणि ग्रामपंचायतींमध्ये मालमत्ता करमाफी करण्याबाबत राज्य सरकारने स्थानिक स्वराज्य संस्थांना आदेश द्यावेत, अशी मागणी आमदार निरंजन डावखरे यांनी मुख्यमंत्री उद्धव ठाकरे यांच्याकडे केली आहे. मालमत्ता करात सवलत दिल्यानंतर, स्थानिक स्वराज्य संस्थांचे उत्पन्न घटणार आहे. या पार्श्वभूमीवर राज्य सरकारने मालमत्ता कराची रक्कम स्थानिक स्वराज्य संस्थांना प्रदान करावी, अशी विनंतीही आमदार डावखरे यांनी केली आहे.
Be First to Comment