पाली मध्ये आरोग्य यंत्रणा फेल : एकाचा बळी !

वेळेत 108 रुग्णवाहिका आणि ऑक्सिजन रुग्णवाहिका उपलबद्ध न झाल्याने पालीत एकाने गमावला प्राण…! ! 🔷🔶🔶🔷

सिटी बेल लाइव्ह / पाली/बेणसे.(धम्मशिल सावंत) 🔶🔷🔷🔶

सुधागड तालुक्यात कोरोना रुग्णसंख्येचा आलेख दिवसागणिक वाढतोय, अशातच सुधागड तालुक्यातील आरोग्य यंत्रणा कुचकामी ठरत असल्याचे  सातत्याने समोर आले आहे. . वेळेत 108 रुग्णवाहिका आणि ऑक्सिजन रुग्णवाहिका उपलबद्ध न झाल्याने मंगळवारी (दि.25) पालीतील एका 57 वर्षीय रुग्णाला हकनाक आपला प्राण गमवावा लागला.

आरोग्य सेवसुविधांची वानवा असल्याने पालीत एकाने आपले  प्राण गमावले! त्यामुळे येथील  आरोग्य यंत्रणा फेल असल्याचे पुन्हा एकदा समोर आले आहे.  पालीतील समर्थ नगरमधील एका 57 वर्षीय रुग्णास कोविड-19 मुळे श्वासोत्सवास घेण्यास त्रास होऊ लागला होता. त्यांना ताबडतोब पाली प्राथमिक आरोग्य केंद्रात उपचारासाठी नेण्यात आले. तिथे गेल्यावर त्यांना ऑक्सिजन न लावता व ऑक्सिजन पातळी तपासणी करून अधिक उपचारासाठी लागलीच रोहा येथे नेण्यास सांगितले. मात्र रुग्णाला नेण्यासाठी 108 नंबर रुग्णवाहिका बंद होती. मागील 6-7 दिवसांपासून इंजिनमध्ये बिघाड असल्याने ही रुग्णवाहिका बंद आहे. तसेच ऑक्सिजन नसलेली दुसरी कुठलीही रुग्णवाहिका उपलब्ध नव्हती.

अखेर त्यांना त्यांच्या खाजगी गाडीमधून ऑक्सिजन शिवाय रोहा येथे रुग्णालयात न्यावे लागले. आणि तिथे गेल्यानंतर त्यांची प्राणज्योत मावळली असे प्रत्यक्षदर्शी कपिल पाटील यांनी सांगितले. मृत व्यक्ती 2 वेळा वावळोली येथील कोविड केअर सेंटरमध्ये तपासणीसाठी गेले होते. तिथे त्यांना लक्षणे नाहीत असे सांगून आणि कोविडची तपासणी करायची असल्यास रोहा किंवा अलिबागला जा असे सांगण्यात आले. तालुक्यात आजवर पाच रुग्णांनी आपले प्राण गमावले आहेत.

येथील सार्वजनिक आरोग्य व्यवस्थेचे तीन तेरा वाजलेले  असून लवकरात लवकर यामध्ये सुधारणा करावी अशी मागणी जोर धरत आहे. दरम्यान स्वातंत्र्य दिनी ह भ प महेश पोंगडे महाराज यांनी ग्रामीण रुग्णालयासाठी आंदोलन केले होते. पालीत ग्रामीण रुग्णालय निर्माण होणे अत्यंत गरजेचे असून सरकारने या मागणीकडे लक्ष देऊन या मागणीची जलद पूर्तता करावी अशी अपेक्षा जनमानसातूंन व्यक्त होताना दिसत आहे. 

केवळ रुग्णवाहिका आणि ऑक्सिजन नसल्याने या रुग्णाचा जीव गेला आहे. लागलीच उपचार आणि रुग्णवाहिका मिळाली असती तर कदाचित त्यांचे प्राण वाचले असते. केवळ आरोग्य विभागाच्या ढिसाळ कारभारामुळे हे झाले आहे. 

कपिल पाटील, प्रत्यक्षदर्शी

108 क्रमांकाच्या रुग्णवाहिकेच्या इंजिनमध्ये बिघाड असल्याने ती काही दिवसांपासून बंद आहे. 102 क्रमांकाची रुग्णवाहिका महिलांच्या प्रसूतीसाठी वापरली जाते. आवश्यकता असल्यास कोलाड व रोह्यावरून रुग्णवाहिका मागवतो. तिथे उपलब्ध असल्यास रुग्णवाहिका मिळते. तसेच महाड येथे इमारत दुर्घटना झाल्यामुळे जिल्ह्यातील काही रुग्णवाहिका तिथे देखील गेल्या आहेत. पाली प्राथमिक आरोग्य केंद्रात ऑक्सिजन उपलब्ध आहे मात्र ते प्रवासासाठी (ट्रान्सपोर्टेशन) वापरले जात नाही. 

डॉ. शशिकांत मढवी,  तालुका वैद्यकीय अधिकारी

108 रुग्णवाहिका बंद असली तरी 3 कंपन्यांमधील  रुग्णवाहिका सेवेसाठी उपलब्ध करून दिल्या आहेत. त्यातील एका रुग्णवाहिकेत ऑक्सिजनची व्यवस्था आहे. तसेच 108 रुग्णवाहिकेच्या दुरुस्तीचा प्रस्ताव देखील पाठवला आहे. लोकांनी थोडीजरी कोविडची लक्षणे आढळल्यास घरी न बसता किंवा खाजगी डॉक्टर कडे उपचार न घेता ताबडतोब सरकारी दवाखान्यात जावे. 

दिलीप रायण्णावार, तहसीलदार, पाली-सुधागड