फसवणूक करणाऱ्या विरोधात आई आणि बहिणीने उगारले उपोषणाचे हत्यार

चुकीची वारस नोंद केल्याप्रकरणी दोषी अधिकाऱ्यांवर कारवाईची मागणी

पनवेल /प्रतिनिधी.
नेरे येथील वडिलोपार्जित जमीन मिळकतीची मृत्यू पत्राद्वारे जाणीवपूर्वक चुकीची वारस नोंद केल्याप्रकरणी तहसीलदार, तलाठी, मंडळ अधिकारी यांच्यावर कारवाई करण्यासाठी आई- बहिणींनी उपविभागीय अधिकारी कार्यालय, पनवेल या ठिकाणी आमरण उपोषणाचे हत्यार उपसले आहे.

नेरे येथील नारायण मांडवकर यांना कुळ कायद्याने जमीन मिळाली त्यांच्या मृत्यूनंतर ती जमीन शंकर मांडवकर यांना मिळाली. वारसा हक्काने मिळालेल्या जमिनीवर बहिणींची नावे लागणे अपेक्षित होते. मात्र मृत्यू दरम्यान सदरची जमीन त्यांच्या नातवाच्या नावे परस्पर हस्तांतरित करण्यात आली. या फसवणूक प्रकरणाचे संदर्भात कायदेशीर वारसांनी हरकती नोंदवल्या आहेत तसेच हे प्रकरण तलाठी व मंडळ अधिकारी यांना प्रत्यक्ष भेटून समजावून सांगितले होते. मात्र जाणीवपूर्वक अधिकाऱ्यांनी या प्रकरणात वारसांना अंधारात ठेवल्याचा ठपका ठेवण्यात येत आहे.त्यांनी हे हेतूपुरस्कार केल्याचे आरोप या महिलांनी केला आहे. विशेष म्हणजे ही जमीन मल्टीमॉडल कॉरिडॉरमध्ये भूसंपादित होत असल्याने याचे करोडो रुपये येणार आहेत. तलाठी, मंडळ अधिकारी यांच्यावर कारवाई करण्यासाठी नुकतेच फसवणूक करणाऱ्याच्या आईने आणि बहिणीने उपोषण केले होते.सदरचा फेरफार नोंद तातडीने रद्द करण्यात यावा, तलाठी, मंडळ अधिकारी यांच्यावर कायदेशीर कारवाई करावी तसेच मंडळ अधिकारी यांच्या निर्णयाला त्वरित स्थगिती द्यावी अशा मागण्या यावेळी करण्यात आल्या होत्या.
सदरहू प्रकरण अर्धन्यायक स्वरूपाचे असून त्यावेळी कोकण पदवीधर मतदारसंघाची आचारसंहिता लागू होत असल्याकारणाने उपोषण मागे घेण्याची विनंती प्रशासनाकडून करण्यात आली. त्यामुळे फसवणूक झालेल्या आई आणि बहिणीने तूर्तास उपोषण मागे घेतले आहे. परंतु दोषी अधिकाऱ्यांवर कारवाई झालीच पाहिजे या मागणीवर त्या आजही ठाम आहेत.